Munstur og Menning
Það er eitthvað við munstur sem alltaf hefur heillað mig, því fór ég snemma að halda þeim til haga. Ýmsir vissu af þessum áhuga mínum og fengu hjá mér munstur. Það varð til þess að ég fór að taka saman hefti með munstrum.
Á þessum árum var Handverkshátíðin á Hrafnagili að festa sig í sessi og datt mér í hug að prófa hvort einhver hefði áhuga á að eignast gömul munstur.
En einn hængur var á. Mér hraus hugur við að standa þarna við borð og bjóða til kaups eigin framleiðslu. Spurði ég því eina dóttur mína hvort hún væri fáanleg til að standa í sölubásnum og láta reyna á hvort einhver hefði áhuga á þessu. Tók hún því vel en sagði jafnframt að ég yrði að leysa sig af, hún gæti ekki staðið þarna allan daginn án þess að geta vikið sér frá og fengið sér brauðsneið. Ég harkaði af mér og leysti hana af og þetta var ekki eins slæmt og ég hélt, eiginlega bara gaman.
En munsturútgáfan hefur hlaðið utaná sig eins og snjóbolti. Titlarnir eru orðnir nokkuð margir. Annars vegar hef ég endurútgefið gamlar íslenskar handverksbækur sem líkastar því sem þær voru og bætt við smá formála með upplýsingum um höfundinn. Hins vegar eru það gömul munstur, gjarnan sitt úr hverri áttinni, sem ég hef raðað saman í hefti eftir efni t.d. milliverk, útskurður og fl.
Útgáfan er ekki stór í sniðum hjá mér eða umsetningin mikil og þannig vil ég hafa það. Þetta er áhugamál fyrst og fremst og meðan mér þykir þetta gaman og einhverjir vilja eignast bækurnar mínar langar mig að halda áfram.
Áhugasamir geta haft samband við mig í síma 860-4933 eða á netfangið jenny@munstur.is
